یارمه‌تی ماڵیی تۆ گیانی گیانی مرۆڤێک ڕزگارو دڵ‌و ده‌رونی بنه‌ماڵه‌یه‌ک خۆش ده‌کات

به‌ندكراوێكی‌ به‌ ئێعدام مه‌حكوومكراو داوای

‌ یارمه‌تیی‌ ماڵیی‌ بۆ كڕینه‌وه‌ی‌ حوكمه‌كه‌ی‌ كردووه‌

 

بێسانسۆڕنیوز:

ژنێکی کورد که‌ له‌ پێناو پاراستنی خۆیدا پیاوێکی ده‌ستدرێژیکاری کوشتبوو و به‌و تاوانه‌ به‌ ئێعدام مه‌حکووم کرابوو‌، داوا له‌ هاووڵاتیانی کورد ده‌کات یارمه‌تیی بده‌ن بۆ دانی "دیه‌" به‌ بنه‌ماڵه‌ی کوژراوه‌که‌. له‌ نامه‌که‌یدا ئاماژه‌ به‌ بواری ناله‌باری ئابووریی بنه‌ماڵه‌که‌ی و جه‌ختیشی ده‌کاته‌وه‌ که‌ "هاوسه‌ره‌که‌م پیر و نه‌خۆشه‌ و منداڵه‌کانیشم توانای دانی ئه‌و بڕه‌ پاره‌یان نییه‌". 

محیبه‌ت مه‌حموودی، که‌ دوای نۆ ساڵ مانه‌وه‌ له‌ به‌ندیخانه‌دا به‌ تاوانی کوشتنی پیاوێکی ده‌ستدرێژیکار، حوکمی ئێعدامه‌که‌ی له‌لایه‌ن دیوانی باڵای کۆماری ئیسلامیی ئێرانه‌وه‌ ئه‌رێ کراوه‌، له‌ نامه‌که‌یدا که‌ نموونه‌یه‌کی بۆ (هه‌واڵده‌ریی چاودێری مافی مرۆڤی کوردستان) ره‌وانه‌ کردووه‌، رایده‌گه‌یه‌نێ که‌ "سکاڵاکاران [بنه‌ماڵه‌ی پیاوه‌ کوژراوه‌که‌] ئاماده‌ لێی ببوورن ئه‌گه‌ر بێتو "دیه‌"ی کوژراوه‌که‌یان وه‌ربگرن".

له‌ نامه‌که‌یدا وێرای ئاماژه‌ به‌ دۆخی ناله‌باری ئابووریی بنه‌ماڵه‌که‌ی، ده‌ستنیشانی ده‌کا که‌ هاوسه‌ره‌که‌ی پیر و په‌ککه‌وته‌ و منداڵه‌کانیشی هێندێکیان ورد و ئه‌وانی دیکه‌ش توانای دانی ئه‌و بڕه‌ پاره‌یان نییه‌.

له‌ نامه‌که‌ی ناوبراودا هاتووه‌ "نزیک به‌ ده‌ ساڵه‌ به‌ تاوانی کوشتنی به‌ئه‌نقه‌ست (له‌ پێناو پاراستنی نامووسدا) له‌ گرتووخانه‌ی ژنان له‌ ورمێ به‌ند کراوم و به‌ "قه‌ساس" مه‌حکووم کراوم، به‌ڵام ماوه‌یه‌که‌ که‌ سکاڵاکاران، له‌ به‌رامبه‌ر دانی "دیه‌"دا، رازی بوون به‌ به‌خشینم."

له‌ درێژه‌ی نامه‌که‌شیدا ئاماژه‌ به‌وه‌ ده‌کات که‌ "به‌داخه‌وه‌ ئه‌من هیچ چه‌شنه‌ سامانێکم نییه‌ تا بیده‌م به‌ سکاڵاکارانم. هاوسه‌ره‌که‌م پیر و په‌ککه‌وه‌ته‌یه‌. هێندێک له‌ منداڵه‌کانم بچکۆڵه‌ن، ئه‌وانه‌ش که‌ گه‌وره‌ترن توانای دانی ئه‌و بڕه‌ پاره‌یان نییه‌. بۆخۆم له‌ گرتووخانه‌ تووشی چه‌ندین جۆر نه‌خۆشیی بووم، له‌وانه‌ رۆمانتیسم، میگرێن و ئازاری گه‌ده‌. هه‌روه‌ها به‌ ده‌ست ئازای ده‌روونییه‌وه‌ ده‌ناڵێنم، ئه‌من ئیتر توانای به‌رگه‌گرتنی گرتووخانه‌م نه‌ماوه‌، منداڵه‌کانم، سه‌ره‌ڕای پێویستییان به‌ دایک، هه‌موو ئه‌و ساڵانه‌یان به‌بێ چاودێریی من تێپه‌ڕ کردووه‌ و ملیان داوه‌ته‌ به‌ر قورسی و کێشه‌کانی ژیان."

له‌ کۆتاییشدا ده‌نووسێ: "به‌ بێده‌سته‌ڵاتی داوای له‌ خه‌ڵکی ئێران ده‌که‌م که‌ بۆ ده‌سته‌به‌رکردنی ئه‌و بڕه‌ پاره‌یه‌، هه‌رچۆنێک که‌ ده‌یانه‌وێ و هه‌رچه‌ندێک که‌ له‌ ده‌ستیان دێ، یارمه‌تیم بده‌ن تا بتوانم سه‌رئه‌نجام دوای ده‌ ساڵ گرتووخانه‌، بگه‌ڕێمه‌وه‌ ناو ئامێزی گه‌رمی بنه‌ماله‌که‌م".

ئادرێس : ارومیه ـ دیزج سیاوش ـ بن بست 8 متری ـ پلاك 242

ژماره‌ ته‌له‌فۆنی کوڕه‌که‌ی (ناسر): 4753-939-0914

 

خوێنه‌ری به‌ڕێز: یارمه‌تی ماددی تۆ ئه‌گه‌ر که‌میش بێت، دیسانیش ده‌بێته‌ له‌مپه‌رێک له‌به‌ر ده‌م ئیعدام کردنی ئه‌م خوشکه‌. جا بۆیه‌ داواتان لێده‌که‌ین هه‌وڵ بده‌ن بۆ کۆکردنه‌وه‌ی پوڵ و پاره‌ بۆ ڕزگارکردنی گیان ئه‌م خوشکه‌ بێتاوانه‌. یارمه‌تی تۆ زامنی ڕزگاری گیانی مرۆڤێکه‌

 

 

 

 

 

نوشته شده در تاریخ سه شنبه 4 اسفند 1388    | توسط: be sansor    |    | نظرات()