نێرەكەر هیچ كـــات غەدری لە ماكەر نەكردووە و خۆی دەكات بە قوربانی

عومەر حوسێن قادر، ناسراو بە (عومەر كلۆلی گەرمیان) سكرتێری حیزبی كەرانی كوردستانی عراق، لەوەسفی خۆیدا دەڵێت “خاوەن خێزانم و 5 جاش نێرەكەر و 2 ماكەرم هەیە، واتا 5 كوڕ و 2 كچ، لەدایكبووی ساڵی 1952ی شاری كفریم، بەڵام 33 ساڵە لەكەلار دەژیم، چونكە لەكفری لەسەر كەرایەتی گیرام، بۆیە هەڵمتیزاند بۆ كەلار، بەرنامەی كەرایەتیم لەساڵی 1979 لەژێر دروشمی (كەرایەتی و كوردایەتی- نەك جاشایەتی و پاشایەتی) هەروەها (بەسە ئیتر خوێنمژین- با هەموو وەك كەر بژین- ئەگەر بێ وەك كەر بژین- ئیتر یەكتر ناكوژین) دەسپێكردووە.
سڤیل: چۆنبوو بیرتان لەدروستكردنی حیزبی كەران كردەوە، ئەی پەیوەندیتان چۆنە لەگەڵ حیزب و رێكخراوەكانی كەران لەدەرەوەی وڵات؟

عومەر كلۆل: من دوای ئەوەی كە زانیم لەدەرەوەی وڵات حیزبی كەران هەیە، بۆیە پێمباش بوو كە لەجێی ئەو كەرانە لەقە بدەم، بۆیە ئەوەی كە من دەیكەم ئێستا، شتێكی فەلسەفییە، چونكە لەهەموو روویەكەوە من توانایەكی زۆرم هەیە، بەڵام بەداخەوە كە دەگوترێت بەرد لەجێی خۆی سەنگینە، چونكە من لەجێی خۆم سووكم سەنگین نیم. لەبارەی پەیوەندیشم لەگەڵ رێكخراو و حیزبەكانی كەران لەدەرەوە، وا تازە خەریكە گوێیان لەدەنگی زەڕینم دەبێت.
سڤیل: ئێوە تەنها بەرگری لەكەرەكانی كوردستان دەكەن، یا بەرگری لەكەری توركی و كەری سوریی و كەری ئێرانیش دەكەن و جیاوازییەك نابینن لەنێوان كەرەكان؟
عومەر كلۆل: براگەورە! كەرەكانی ئەوان های لایڤ دەژین، تەنها كەرەكانی كوردستان فەوتاون، تا ئیشی پێدەكەن دواتر مەرەخەسی دەكەن، ئەوان وانین و بەویژدانن، بەڵام ئێمە ئیسلامین بەعادەت نەك بەعیبادەت. من بۆخۆم بەزەییم بەهەموو ئاژەڵێك دێتەوە، بەڵام گرنگی زیاترم بەبراگەورە (كەر) داوە، لەبەر ئەوەی لەهەموویان زیاتر رەنج دەدات و لەهەمووشیان زیاتر مەغدوورە.
سڤیل: ئیوە هیچ جیاوازییەك دەبینن لەنێوان نێرەكەر و ماكەر؟ هەستناكەن نێرەكەر زۆرجار غەدر لەماكەر دەكات، بەتایبەت لەكاتی جوتبوون، زۆرجار ماكەر حەزی لێ نییە، بەڵام نێرەكەر تەحەروشی پێدەكات؟
عومەر كلۆل: براگەورە! هەردووكیان یەكسانن لای ئێمە، چونكە ئەگەر نێرەكەر نەبێت ماكەریش نابێت، بەپێچەوانەوەش، قەت نێرەكەریش غەدری لەماكەر نەكردووە و نەشی چەوساندۆتەوە، بەپێچەوانەوە، نێرەكەر خۆی دەكاتە قوربانی ماكەر، نێرەكەر ئەگەر ماوەیەك نەپەڕی بێت، خۆی دەكاتە قوربانی ماكەر و بەبانییەوە دەمرێت.
سڤیل: كەر چەند ساڵ دەژیت و چەند جۆری هەیە، ئەی ماكەر چۆن سك دەكات؟
عومەر كلۆل: براگەورە! ماكەر ساڵی جارێك سك دەكات و 12 مانگیشە ماوەی سكپڕبوونەكەی، تەمەنی كەریش بەپێی گوزەرانیەتی، لەكەلار كەرێكم دەناسی لەساڵی 1975 لەدایكبوو، لەساڵی 2000 كۆچی دوایی كرد، 25 ساڵ ژیا، ئەمەش لەبەر ئەوەبوو كە خاوەنەكەی زۆری خۆشدەویست، بەڵام بەشێوەیەكی گشتی كەر لەكوردستان لەنێوان 17 تا 20 ساڵ دەژیت. ئەگەر سەیری ئەوروپاش بكەین بەهۆی خۆشگوزەرانیان كەر لەوێ تا 30 ساڵ دەژیت.
جۆرەكانی كەریش زۆرن، كەری بەغدایی هەیە كە زۆر گەورەن و دەڵێی هێسترن، بەڵام عەیبێكیان هەیە گەر بەبارەوە بكەون بەنەقیزەش هەڵناستنەوە، بەڵام كەری شارباژێر و قەرەداغ گەر بەبارەوەش بكەون، خۆیان هەڵدەستنەوە، كەری لەیلانمان هەیە، كەری عەنكاوە و كەری ئابڵاخ.
سڤیل: كەر چەند ددانی هەیە؟ حەزدەكەم ئەوەش بزانی كە تائێستا خەڵكێكی زۆر وا دەزانن ناوكی كەر كەوتۆتە ژێر سكی، ئەوەش رونناكەیتەوە؟
عومەر كلۆل: نێرەكەر 40 ددانی هەیە و ماكەریش 36 ددانی هەیە. ناوكی كەریش كەوتۆتە ژێر دەستی چەپی.
سڤیل: ماوەیەك لەمەوبەر، لەدەوروبەری هەولێر، لەسەر ئەوەی نێرەكەری ماڵێك چووبووە لای ماكەری ماڵێكی دیكە، خەریكبوو شەڕی عەشیرەتگەری لێ بكەوێتەوە، تۆ دەڵێی چی؟
عومەر كلۆل: ئێ توخوا ئەوە دواكەوتوویی نییە، ئەی كەریش مافی خۆی نییە، ئەوە دیارە خۆشناون، ناوچەی خۆشناوەتی و دەشتی لای ئێمە ماكەر بەخێوناكەن، دەڵێن شەرمەزارییە.
سڤیل: لەسەر تۆپبارانكردنەكانی ئەم دواییەی قەندیل و ناوچە سنووریەكان لەلایەن ئێران، من زانیاری وردم لانییە، بەڵام دڵنیام كەوا كەریش بەهۆی تۆپبارانەكە مردوون، ئێوە هیچ هەڵوێستێكتان هەبووە؟
عومەر كلۆل: چۆن هەڵوێستمان نەبووە، بەیاننامەمان بڵاوكردەوە و لەوێ دەڵێم (بەسە ئیتر بۆردومان لەناوچە سنووریەكان- هەموو دێتان كرد وێران- خوا بتانكاتە قوربانی منداڵێكی ساوامان- ئێمە كەری باشوورین، بەجووتەدان مەشهورین- بەنەعرەتە و زەڕین، كۆت و زنجیر دەبڕین- شاختان دەشكێنین بڕۆن، زۆر تاوانبار و تڕۆن) بەداخەوەش لەو تۆپبارانانە تائێستا دوو كەر كوژراون و دوو جاشكیان بەهەتیوی جێهێشتووە و ئێستا جاشكەكانم هێناوەتە لای خۆم و بەمەمەی شیر بەخێویان دەكەین.
سڤیل: بۆچی خەڵكی كەر بەكەم عەقڵ وەسفدەكەن، وەڵامی ئێوە بۆ ئەو خەڵكە چییە؟
عومەر كلۆل: براگەورە! توێژینەوەیەكی نوێ سەلماندی كە عاقڵترین حەیوان كەرە، بەڵام بەداخەوە تائێستاش لەناو كورد بۆ گەوجی بەكاری دەهێنن، منیش دەڵێم “زۆر هەیە بۆ بێ عەقڵی كەر دەكا بەنموونە- ئەو بێ عەقڵە باشترە یا مانگا و قەلەموونە”، مانگا و عەلەشیش بێ عەقڵن، كەر خورمای بدەرێ، ناوكەكەی فڕێ دەدات، مانگا شوتی گەنیو و كیلۆیەك تڕخێنە و لایلۆن بەیەكەوە ئاودیو دەكات. كەر لەئالیك و خواردندا بەقەناعەتە و كەمخۆری دایمخۆرە، بەڵام مانگا گەر چاوت لێی نەبێت هێندە دەخوات، مردار دەبێتەوە، كەر تەنها لەئاو خواردنەوە قەناعەتی نییە، ئەویش هۆكارەكەی زۆر تێنوو بوون و چەوساندنەوەكەیەتی، هەرچ كاتێك بیبەی بۆ لای چەمێ ئاو، میز دەكا و دەڵێ با میزڵدانیشم پڕبێت توخوا.
سڤیل: ئێوە بۆخۆتان بەچ سیفەتێكی كەر زۆر سەرسامن؟
عومەر كلۆل: سەبر و قەناعەت و ئیتاعەت و خزمەتی بێ پاداشت، ئەوەش یەكێ لەمەرجەكانی ئەندامێتیە لای ئێمە (رەوشتكەری- درۆنەكەری- وڵاتپەروەری).
سڤیل: زۆر لەنووسەرە كوردەكان كتێبیان نووسیوە لەسەر كەر، لەوانە (مەحمود زامدار) كتێبێكی بەناونیشانی (كۆمیدیای كەرایەتی) هەیە، بیرتان لەوە نەكردۆتەوە ئەو نووسەرانە لەڤیستیڤاڵێك خەڵات بكەن؟
عومەر كلۆل: نەوەڵا بیرمان لەخەڵات نەكردۆتەوە، ئەی من چیبكەم تائێستا 240 هۆنراوەم لەسەر كەر نووسیوە و 33 ساڵە كەرم تائێستاش تەنەكەیەك جۆ خەڵات نەكراوم، مەحمود زامدار یەك لەقەی داوە، بۆ لەقەیەك خەڵات؟
سڤیل: ماوەیەكە بەنیازن رادیۆیەك لەكەلار بكەنەوە، بەرنامەكانی ئەو رادیۆیە چۆنە و كێ هاوكاریتان دەكات؟
عومەر كلۆل: لەخوا بەزیادبێت وا هاوكاری دەكرێین و بەرپرسێكی گەورە ئاوڕی لێمان داوەتەوە، بەو نزیكانە خەریكین (رادیۆی دەنگی زەڕین) لەگەڵ خان (سكرتاریەت)ێك لەگەرمیان بكەینەوە، رادیۆكەش هەر لەخانەكەی خۆم دەبێت و بەرنامەكانیشی نێرەكەرێك (پیاو) دەخەینە سەر ئەنتەرنێت و زانیاریەكان وەربگرێت و بەیانیان 2 كاتژمێر و ئێوارانیش 2 كاتژمێر دەیكەینەوە.
سڤیل: ئێمە هیچ پرسیارمان نەما، تۆ هیچت ماوە؟
عومەر كلۆل: سوپاس، وەڵا من حەزدەكەم بەسروودی حیزب كۆتایی بەقسەكانم بهێنم (هەڵستن لەخەو كەرینە- وا وەعدەی راپەڕینە- تا ئەژنۆ لەقوڕاوە- توخوا كەی ئەوە ژینە- باری قورستان لێ دەنێن، هەموو گیانتان برینە- كەری پیریان لەبیر چووە- كوا وەفا لەم زەمینە- خۆزگە هەموو وەكو من تۆی دەناسی شای شیرینە- دە دەسكەن بەزەڕەزەڕ زەڕەشتان هەر شیرینە).

Entry Filed under: حزب كـــــەرانی كــــوردستان. .

نوشته شده در تاریخ سه شنبه 19 مرداد 1389    | توسط: be sansor    |    | نظرات()